Daniel Tamayo. Fabulario

Daniel Tamayo (Bilbao, 1951) Euskal Herriko Unibertsitateko Arte Ederretako Fakultateko lehenengo promozioko ikasleetako bat izan zen, eta orain irakaslea da bertan. Hirurogeita hamarreko hamarkadaren amaieran hasi zuen bere ibilbide artistikoa, pop mugimenduaren eta Espainiako arte garaikideko figuretako batzuen (besteak beste, Luis Gordillo) eraginpean. Bere figurazio-kodea aztertuta, marrazki geometrikoekiko, objektu-izaerako formekiko eta tinta lauko kolore biziekiko gustua nabarmentzen da. Erakusketan, 2000 eta 2010. urteen artean egindako 20 margo baino gehiago bilduko dira, denak ere neurri ertain eta handikoak, eta, kasu gehienetan, sekula erakutsi gabeak. Izaera eszenografiko handiko lan hauek Tamayoren alegiazko akuarelekin daude lotuta, baina, kasu honetan, olioak eta formatu handiak erabilita.